Saturday, January 5, 2008

മൂന്നാം ലോകമഹായുദ്ധം(ചരിത്രത്തില്‍ രേഖപ്പെടുത്താത്ത ഒരേട്)

1990ല്‍ സോവ്യേറ്റ് യൂണിയന്‍ തകര്‍ന്നതോടെ ശീതയുദ്ധത്തിനു ശമനമായി. അതുവരെ നിലനിന്നിരുന്ന മറ്റോരു ലോകമഹായുദ്ധത്തിന്റെ സാധ്യത ഇല്ലതായതില്‍ ലോകം ആശ്വസിച്ചു. എന്നാല്‍ സോവ്യ്യേറ്റ് യൂണിയന്‍ തകര്‍ന്നിട്ട് കൃത്യം 3 വര്‍ഷം പിന്നിട്ടപ്പോള്‍ ഈ ലോകം മറ്റോരു യുദ്ധത്തിനു സാ‍ക്ഷ്യം വഹിച്ചു. ഗള്‍ഫ് യുദ്ധമെന്നു കരുതിയെങ്കില്‍ തെറ്റി. അതിലും ഘോരമായ മറ്റൊരു ലോകമഹായുദ്ധം. ഏറ്റവും ചുരുങ്ങിയ സമയം കൊണ്ട് അവസാനിച്ച ലോകമഹായുദ്ധം. ചരിത്രത്തില്‍ ഇതു വരെ രേഖപ്പെടുത്തിയിട്ടില്ലാത്ത ഒരേട്..

നാല് എ ക്ലാസില്‍ ശശിമാഷ് സാമൂഹ്യപാഠം ക്ലാസ് എടുത്തുകൊണ്ടിരിക്കുന്നു. രണ്ടാം ലോകമഹായുദ്ധത്തെ കുറിച്ചാണ് പാഠം. ഹിറ്റ്ലറും, മുസോളിനിയും, നാസിസവും, ഫാസിസവും അരങ്ങു തകര്‍ക്കുകയാണ്. അതേ സമയം ക്ലാസിലെ നാലാമത്തെ ബഞ്ചില്‍ ഒരു സംഘം കുട്ടികള്‍ മറ്റൊരു യുദ്ധത്തിന്റെ ആലോചനയിലായിരുന്നു. മൂന്നാം ലോകമഹായുദ്ധം. സംഘത്തിന്റെ നേതാവ് ഒരു ചന്ദനപ്പൊട്ടുകാരന്‍ ‘തല്ലുകൊള്ളി’ പോക്കറ്റില്‍ നിന്ന് ഒരു പേപ്പര്‍ കയ്യിലെടുത്തു സഖ്യകക്ഷികളിലെ പങ്കാളികളുടെ പേരു വിവരമാണ് പേപ്പറില്‍. യുദ്ധത്തിലെ പങ്കാളികളുടെ പേരു വിളിച്ച് നമ്മടെ സംഘത്തലവന്‍ കൂട്ടാളികള്‍ക്ക് ഒരോ ഉത്തരവാദിത്തം ഏല്‍പ്പിക്കുകയാ‍ണ്. അതിനിടെ പിന്‍ബഞ്ച് ചര്‍ച്ചകള്‍ ശശിമാഷിന്റെ ശ്രദ്ധയില്‍പ്പെട്ടു. തല്ലുകൊള്ളിയെ പേരുചൊല്ലി വിളിച്ച് മാഷ് ഒരു ചോദ്യമിട്ടു.

“ജയന്‍... സ്റ്റാന്റ് അപ്പ്. രണ്ടാം ലോകമഹായുദ്ധത്തിന്റെ കാരണമായ സംഭവമേതാണ്?” തല ചോറിഞ്ഞും, കഴുക്കോലെണ്ണിയും കോമ്രേഡ് തല്ലുകൊള്ളി അടുത്ത തല്ലുവാങ്ങാന്‍ തയ്യാറെടുത്തു. രണ്ടാം ലോകമഹായുദ്ധത്തിന്റെ കാരണം അറിയില്ലെങ്കിലും തങ്ങള്‍ പദ്ധതിയിടുന്ന മൂന്നം ലോകമഹായുദ്ധത്തിന്റെ കാരണം മൂപ്പര്‍ക്ക് വ്യക്തമായറിയാമായിരുന്നു.

നാല് ബിയില്‍ പഠിക്കുന്ന അനീഷ് ശിവാലമഠ്മാണ് കുഴപ്പങ്ങള്‍ക്ക് തുടക്കമിട്ടത്. നമ്മടെ കഥാനായകന്‍ തല്ലുകൊള്ളിയുടെ സഹബഞ്ചന്‍ ശ്രീജേഷിന്റെ അച്ഛന്‍ കൊണ്ടുവന്നു കൊടുത്ത ഫോറിന്‍ പേന പുള്ളിക്കരന്‍ അടിച്ചുമാറ്റി. അതു ചോദിക്കാന്‍ ചെന്ന സ്കൂളിന്റെ ആസ്ഥാന തല്ലുകൊള്ളി, നമ്മടെ സംഘത്തലവനെ മൂപ്പിലാനൊന്നു വെല്ലുവിളിച്ചു. നേരിട്ട് ഒരു ഏറ്റുമുട്ടല്‍ നടത്തി തടി കേടാക്കാന്‍ രണ്ടുപേരും തയ്യറല്ലായിരുന്നു. പക്ഷേ സംഭവം സ്കൂളില്‍ വലിയ വാര്‍ത്തയായി. തല്ലുകൊള്ളിയുടെയും അനീഷ് ശിവാലമഠത്തിന്റേയും നേതൃത്വത്തില്‍ നാല് എ യിലെയും നാല് ബിയിലേയും മറ്റ് തല്ലുകൊള്ളികള്‍ അണിനിരന്നു. ഇരുകൂട്ടരും അങ്കം കുറിച്ചു. വരുന്ന വെള്ളിയാഴ്ച്ച പി. ടി പിര്യേഡില്‍ തൃച്ചംബ്ബരം സ്കൂള്‍ ‍ഗ്രൌണ്ടില്‍ നാല് എയിലെ സഘ്യകക്ഷികലും, നാല് ബിയിലെ അച്ചുതണ്ടു ശക്തികളും ഏറ്റുമുട്ടും. മൂന്നാം ലോക മഹായുദ്ധം. ആ വെള്ളിയാഴ്ച്ചയാണ് യുദ്ധതന്ത്രങ്ങള്‍ ആവിഷ്ക്കരിക്കുന്നതിനിടെ ശശിമാഷ് നമ്മടെ തല്ലുകോള്ളിയെ പൊക്കുന്നത്. ഉത്തരം മുട്ടിനിന്ന പുള്ളിക്കാരനും കൂട്ടുപ്രതികള്‍‍ക്കും ക്ലാസ് തീരും വരെ ചുമരരികില്‍ നില്‍ക്കാന്‍ ശിക്ഷ വിധിച്ച് ശശിമാഷ് ക്ലാസ് തുടര്‍ന്നു. അതേസമയം നാല് ബിയില്‍ അനീഷ് ശിവാലമഠത്തിന്റെ നേതൃത്വത്തിലുള്ള അച്ചുതണ്ട്ശക്തികള്‍ അവരുടെ യുദ്ധതന്ത്രങ്ങള്‍ക്ക് കോപ്പ് കൂട്ടുകയായിരുന്നു.

3:15 pm

പി.ടി പിര്യേഡിന് ക്ലാസ് വിട്ടു. ഗ്രൌണ്ടില്‍ പടയാളികള്‍ അണിനിരന്നു. സഖ്യകക്ഷികളില്‍ സംഘത്തലവന്‍ നമ്മടെ തല്ലുകൊള്ളിക്കൊപ്പം ശ്രീജേഷ്, മനു, രണദിവെ, സജേഷ് തുടങ്ങിയ പ്രമുഖരുള്‍പ്പടെ 21പേര്‍ മറുവശത്ത് അനീഷ് ശിവാലമഠത്തിന്റെ നേതൃത്വത്തില്‍ വിനോദ്, ശ്രീജിത്ത്, മനോജ് തുടങ്ങിയ പേരുകേട്ട മറ്റു തല്ലുകൊള്ളികളും. ആയുധമില്ലാതെ കൈകൊണ്ടാണ് യുദ്ധം, ഇരുകൂട്ടരും അംഗീകരിച്ച യുദ്ധമാന്വലില്‍ അത് പ്രത്യേകം പറഞ്ഞിട്ടുണ്ട്. സഖ്യകക്ഷികളും അച്ചുതണ്ട് ശക്തികളും മുഖാമുഖം നില്‍ക്കുകയാണ്. സഖ്യകക്ഷികള്‍ക്കിടയില്‍ നിന്ന് കോമ്രേഡ് തല്ലുകൊള്ളി മുന്നോട്ടു വന്നു, മറുവശത്ത് നിന്ന് അനീഷും. ബ്രാഡ്പിറ്റ് സായിപ്പ് (മ്മടെ ആഞ്ചലീനേടെ കെട്ട്യോന്‍) അഭിനയിച്ച ‘ട്രോയ്’ എന്ന ഇംഗ്ലീഷ് സിനിമേല് വില്ലനും ബ്രാഡ്പിറ്റും മുഖാമുഖം നിലക്കണമാതിരി രണ്ടാളും നിന്നു. എന്നിട്ട് ആ പടത്തിലെപ്പോലെ നമ്മടെ തല്ലുകൊള്ളിബ്രാഡ്പിറ്റ് വില്ലന്‍അനീഷിനു നേരെ ആക്രോശത്തോടെ പാഞ്ഞടുത്തു. സിനിമേല് ബ്രാഡ്പിറ്റ് സായിപ്പ് ഒറ്റക്കുത്തിന് എതിരാളികളുടെ തലവനെ കൊല്ലുകയാണ്. ഇവിടെ സംഭവിച്ചത് മറ്റൊന്നാണ്. അനീഷ് ശിവാലമഠം നമ്മടെ തല്ലുകൊള്ളിബ്രാഡ്പിറ്റിനെ തൂക്കിയെടുത്ത് ഒറ്റയേറ്... “ഹെന്റമ്മച്ചീ‍............” എന്നൊരു വൃത്തികെട്ട ശബ്ദത്തോടെ കഥാനായകന്‍ നിലത്ത്. പടനായകന്‍ “വീണിതല്ലോ കിടക്കുന്നു ധരണിയില്‍” എന്നമട്ടില്‍ കിടക്കണതുകണ്ടപ്പോ മൂന്നാം ലോകമഹായുദ്ധത്തിനിറങ്ങിത്തിരിച്ച നാല് എയിലെ സഖ്യകക്ഷികള്‍ക്ക് മുട്ടിടിച്ചു.

പക്ഷേ നമ്മടെ തല്ലുകൊള്ളി ആളൊരു “സോഷ്യലിസ്റ്റാ”. സ്ഥിതിസമത്വം എല്ലാകാര്യത്തിലും വേണമെന്നു വാശിയുള്ള ഒരു കറകളഞ്ഞ സോഷ്യലിസ്റ്റ്. തല്ലാണെങ്കിലും കിട്ടുമ്പോ എല്ലാര്‍ക്കും കിട്ടട്ടേ എന്നാണ് പുള്ളിക്കാരന്റെ നയം. മൂപ്പര് ചാടി എഴുന്നേറ്റു. ട്രൌസറിനു പിന്നില്‍ പറ്റിയ പൊടിതട്ടിക്കളഞ്ഞു. എന്നിട്ട് പടയാളികളൊട് ആഹ്വാനം ചെയ്തു “ആക്രമണ്‍...... ” രാമാനന്ദ് സാഗറിന്റെ പഴയ ‘രാമായണത്തിലെ’ വനരപ്പ്ടയേയും രാക്ഷസപ്പടയേയും പോലെ ഇരുകൂട്ടരും പാഞ്ഞടുത്തു. പൊരിഞ്ഞ യുദ്ധം. അനീഷ് ശിവാലമഠവും സംഘവും തകര്‍ക്കുകയാണ്. തല്ലുകൊള്ളിയെ തിരഞ്ഞു പിടിച്ച് പൂശാന്‍ പ്രത്യേകം ടീമിനെ തന്നെ ഏതിരാളിക്കള്‍ നിയോഗിച്ചിരുന്നു. തടികേടാകുന്ന മട്ടായപ്പോ പുള്ളിക്കരന്‍ പതുക്കെ യുദ്ധരംഗത്തുനിന്നും വലിഞ്ഞു. മാറിനിന്നപ്പോളാണ് സംഭവത്തിന്റെ ഗൌരവം കക്ഷിക്ക് പിടികിട്ടണേ. മറ്റവന്മാര്‍ അടിച്ചു നിരത്തുകയാ. ഇക്കണക്കിന് പോയാ കട്ടപ്പൊക. യുദ്ധം തോറ്റതു തന്നെ. ഇനി അറ്റകയ്യായി അണുആയുധം പ്രയോഗിക്കുകയേ നിവൃത്തിയുള്ളൂ. മഹാഭാരതയുദ്ധത്തില്‍ പോലും അറ്റകൈക്ക് ബ്രഹ്മാസ്ത്രം ഉപയോഗിച്ചിട്ടില്ലേ? കര്‍ണ്ണന്‍ അര്‍ജുനനെക്കൊല്ലാന്‍ മാത്രം കൊണ്ടു നടന്ന ഇന്ദ്രചാപം ഒടുവില്‍ നിവൃത്തി ഇല്ലതായപ്പോള്‍ ഭീമസേനന്റെ മകന്‍ ഘടോല്‍ഖചനെ കൊല്ലാന്‍ ഉപയോഗിച്ചില്ലേ. അതുകൊണ്ടുതന്നെ മറ്റുമാര്‍ഗങ്ങള്‍ ഒന്നുമില്ലാതെ വരുമ്പോള്‍ യുദ്ധരംഗത്ത് മാരകായുധങ്ങള്‍ ഉപയോഗിക്കുന്നതില്‍ തെറ്റില്ലെന്ന് ഇതിഹാസഗ്രന്ഥങ്ങളടക്കം പറഞ്ഞിട്ടുള്ളതാണ്. ഇനിയിപ്പോ മറ്റുവഴികളൊന്നുമില്ല. അമേരിക്ക ഹിരോഷിമയിലിട്ട ലിറ്റില്‍ബോയിയെക്കാളും ആഘാതശേഷിയുള്ള ഒരു അണുബോംബ് രഹസ്യമായി നേരത്തേതന്നെ നമ്മടെ കഥാനായകന്‍ കരുതിയിരുന്നു. റോഡുപണിക്ക് അവിടെ കൂട്ടിയിട്ടിരിക്കുന്ന മെറ്റല്‍കൂനയിലെ ഏറ്റവും മികച്ച ഒരെണ്ണം. അനീഷിനു തന്നെ കൊടുക്കണം അണുബോംബ്. പക്ഷേ എത്ര ഉന്നം പിടിച്ചിട്ടും രക്ഷയില്ല. ഒടുവില്‍ മൂപ്പിലാന്‍ കണ്ണൂം പൂട്ടി ഒരേറു വച്ചു കൊടുത്തു. “അമ്മേ.... എന്നൊരു നിലവിളികേട്ടപ്പോളാണ് കണ്ണു തുറന്നേ. അണുബോംബ് പണി പറ്റിച്ചു. പക്ഷേ കൊണ്ടത് നമ്മടെ വില്ലനായിരുന്നില്ല. തല്ലുകൊള്ളിയുടെ വലംകൈ ശ്രീജേഷിന്റെ തലപൊട്ടി ചോരയൊലിക്കുന്നു. മറ്റുകുട്ടികളെല്ലാം പകച്ച് നില്‍ക്കുന്നു. എന്തായാലും യുദ്ധം നിന്നു. പക്ഷേ യുദ്ധത്തിന്റെ അനന്തരഫലം കടുത്തതായിരുന്നു. ശ്രീജേഷിന്റെ തലയ്ക്ക് 9 സ്റ്റിച്ച്. 4 ദിവസം ആശുപത്രിക്കിടക്കയില്‍ അതില്‍ ഒരു ദിവസം ഒബ്സര്‍വേഷനിലും.

എന്തായാലും തല്ലുകൊള്ളിയുള്‍പ്പടെ യുദ്ധത്തില്‍ പങ്കാളികളായ സകലരും ഹെഡ്ടീച്ചറുടെ മുന്നിലേക്ക് ആനയിക്കപ്പെട്ടു. പതിവു വഴക്കുപറച്ചില്‍. ഒടുവില്‍ ശിക്ഷ വിധിച്ചു. കോമ്രേഡ് തല്ലുകൊള്ളി ഒഴികെ സ്കൂളിലെ ഗുണ്ടാ ലിസ്റ്റിലുള്ള 15 പേര്‍ക്ക് കിട്ടിയ ശിക്ഷ രക്ഷിതാവിനെ കൊണ്ടുവന്ന് മത്രം ഇനി ക്ലാസില്‍ കയറുക. തല്ലുകൊള്ളിയുടെ മാതാശ്രീ പാവം ഹൈമവതി ടീച്ചര്‍ സ്കൂളില്‍ തന്നെയുടല്ലോ. അപ്പോ ഇനി പ്രത്യേകം കൊണ്ടു വരേണ്ടതില്ലല്ലോ..! മറ്റുള്ളവര്‍ മാപ്പു സക്ഷികള്‍.

പ്രിയപ്പെട്ട ചരിത്ര കുതുകികളേ..

നിങ്ങള്‍ക്കായി ചരിത്രത്തിലിതുവരെ രേഖപ്പെടുത്തിയിട്ടിലാത്ത ഒരു ലോകമഹായുദ്ധത്തിന്റെ; അതും ഏറ്റവും ചുരുങ്ങിയ സമയം കൊണ്ട് അവസാനിച്ച ഒരു മഹായുദ്ധത്തിന്റെ വിശദാംശങ്ങളാണ് ഞാന്‍ എന്ന തല്ലുകൊള്ളി ഇവിടെ അവതരിപ്പിച്ചിരിക്കുന്നത്. ഈയൊരു മഹാദൌത്യം നിര്‍വ്വഹിക്കാനായതില്‍ ഞാന്‍ കൃതാര്‍ത്ഥനാണ്. ഇതുവഴി ചരിത്രത്തിന്റെ ഏടുകളില്‍ സ്ഥാനം പിടിക്കുകയെന്ന ആഗ്രഹം കൊണ്ടൊന്നുമല്ല ഞാന്‍ ഇതിവിടെ അവതരിപ്പിച്ചത് എന്ന് വിനയ പൂര്‍വ്വം പറഞ്ഞുകൊള്ളട്ടെ. പകരം അത്യാഗ്രഹം കൊണ്ട് മത്രമാണ്.

7 comments:

yadu said...

dears
thallukolliyude blogs vaayikkumbol njan shariykum ende kuttikalatheyk thirichu pokukayanu.. how well discribing na? ee thallukollitharam eneem thudaratte ennu mathram prarthiykunnu..

G.manu said...

മാഷെ, ഇപ്പൊഴാണല്ലോ കണ്ടത്...
ദില്ലിയില്‍ എവിടെയാണ്..
ഒരു മെയില്‍ അയക്കുമോ....


gopalmanu@gmail.com

pradu said...

Da jaya ,

Nannaayeettund ennu njan theerthu parayilla. b coz thallukollithram arkum gund/ badayi adikkam. njan sathyam parayumbol nee vicharikkum asooyayaaannu,.( sathyamanenkilum) pakshe athallatto.

athra dhairyam undenkil nee enthukondu BVB yil ethunnilla. aithihasika kathakal ettavum kooduthal undakille. do include our bhavans life if there is any missing i will comment it.

very best wishes da ..
nannayi...

UMMMAAAHHH...PATTICHE.. PRADEEPPALAKKAL@GMAIL.COM

തല്ലുകൊള്ളി said...

യദു, മനു,പ്രദീപ് നന്ദി...
പിന്നെ മോനെ പ്രദീപേ ബവന്‍സ് ജീവിതത്തിലെ എന്റെ വീരഗാഥകള് പറയാന്‍ തുടങ്ങിയാ ആദ്യം നാറാന്‍ പോകുന്നത് നീതന്നെയാകും...
പേടിക്കണ്ട... എതും ഞാന്‍ അവിടെ എത്തും അപ്പൊക്കാണാലോ...

Sajjad.c said...

mmm great

Madampu Vasudevan said...

വളരെ നന്നായിടുണ്ട് പണ്ട് ബോംബയില് വെച്ചു ഏകദേശം ഇത് പോലെ ഒരു അനുഭവം എനിക്കും ഉണ്ടായിടുണ്ട് അതു കൊണ്ടായിരിക്കാം ആ ബ്ലാക്ക് ആന്ഡ് വൈറ്റ് ഫോട്ടോ എന്നെ വല്ലാതെ അസ്വസ്തനാക്കിയത്

madampu vasudevan

sumi said...

entho pole..............
enikenthokeyo nashtapedunnu.
ippo njanathu orthupokunnu.
ninte bhasha kollaam.
onnum vendiyirunnilla ennu thonnunnu.ottakk mathiyayirunnu.
pazhayathupole ini enikk.........
ariyilla.enikkini orikkalum ezhuthaan kazhiyilla jaya.